Dipigawe Sorangan

RANGGEUYAN MUTIARA

HIJI peuting, Khalifah Umar bin Abdul Aziz kadatangan semah. Eta semah taya lian ti dulurna sorangan. Harita teh, Khalifah keur nulis, jeung kabeneran lampu nu nyaanganana rek pareum, sigana mah minyakna beak.
     "Keun ku abdi we atuh urang eusian deui minyakna," cek eta semah.
     "Moal jadi hiji kamulyaan atuh ngaranna lamun kuring nitah semah mah," tembal Khalifah Umar bin Abdul Aziz.
     "Mun kitu mah urang calukan abid atuh?" semah teh nyarita deui.
     "Ulah, asa kakara rareureuh maranehna teh," pokna deui.
     Saterusna Khalifah Umar amitan heula ka jero. Anjeunna nyicikeun minyak kana lampu nu meh pareum tea. Lampu nu meh pareum tadi teh basa dibawa deui kaluar caang ngempray.
     "Anjeun nyalira nu midamel eta padamelan, ya Amirul Mu'minin?" cek semah nanya.
     "Kuring ngeusian minyak kana lampu sarta ngahurungkeunana deui, taya nu bakal robah. Kuring tetep Umar, teu kurang saeutik oge. Sahade-hadena manusa teh nyaeta nu mibanda sikep handap asor di payuneun Gusti Alloh."
Tesaf (Glr/1 Okt 2006)