Drs. S. Teguh Santoso, Kabid KS-PK BKKBN Jabar: “Pelayanan KB Gratis Kudu Terus Dihangkeutkeun”

      Meh unggal waktu di sabudeureun Lapangan Tegallega hususna di Monumen BLA teu weleh rame. Komo deui dina poe Minggu mah, lian ti sok dipake kagiatan olahraga oge sok dipake kagiatan-kagiatan hiburan. Saperti dina tanggal 5 Desember kamari, di ieu tempat aya kagiatan "Konser Amal Solusi Persaudaraan untuk Indonesia Makin Mantap". Dina eta kasempetan, BKKBN Jabar gawe bareng jeung hiji radio swasta nu aya di Bandung ngayakeun kagiatan pelayanan  KB Gratis pikeun masarakat.

     Nurutkeun Kabid Pengendalian KS-PK BKKBN Jabar, Drs. S. Teguh Santoso, dina kagiatan pelayanan KB Gratis teh sababaraha personil husus katut kendaraan operasional unit pelayanan KB diterjunkeun. Tujuanana taya deui pikeun ngalayanan masarakat nu butuh pelayanan KB hususna IUD, kondom jeung suntik kalawan gratis.
     Kagiatan pelayanan KB gratis teh tetela meunang pangbagea nu hade ti masarakat. Ti mimiti dibuka stand pelayanan KB, masarakat geus ngagimbung minuhan stand tempat pelayanan KB Gratis. Lian ti hayang konsultasi oge maranehna teh hayang leuwih apal ngeunaan program KB leuwih jero.
     "Alhamdulillah najan ukur sababaraha jam kagiatan pelayanan KB Gratis teh, ti tabuh salapan nepi ka tabuh hiji beurang, tapi pangbagea ti masarakat kawilang nyugemakeun," cek Teguh Santoso.
     Masih cek Teguh Santoso, ka hareupna dipiharep  kagiatan pelayanan KB gratis bisa terus dihangkeutkeun.   Dimana aya kagiatan nu ngalibatkeun masarakat umum pelayanan KB Gratis kudu aya.
     Eta kahayang teh tetela diaminan ku sababaraha peserta pelayanan KB Gratis basa ditanya kumaha harepan kahareupna. Sabab ku ayana ieu kagiatan, ceuk maranehna saeutikna bisa ngurangan beban biaya lamun kudu indit ka dokter atawa ka bidan bari mayar biaya pelayanan KBna.*
Tesaf

Nu Teu Katingali

RANGGEUYAN MUTIARA

     DINA hiji waktu disarengan ku parasahabatna, Kangjeng Nabi Muhammad Saw anjog ka hiji tempat di padang pasir. Di eta tempat teh saeutik ge teu katingali aya tatangkalan. Nu katingali teh amparan keusik we nu kacida legana. Sanggeus reureuh, Kangjeng Nabi Muhammad sasauran ka parasahabatna, butuh ku sabangsaning regang pisuluheun.

     "Urang teh butuh ku kayu pikeun nyieun seuneu," saur Kangjeng Nabi ka parasahabatna.
     "Tangtos we atuh ya Jungjungan. Nanging, rupina mah urang moal mendakan di dieu mah," walon parasahabat.
     "Nu penting mah urang ihtiar heula, memeh pegat pangharepan," saur Kangjeng Nabi deui.
     Sanggeus meunang parentah kitu mah, sarerea mencar ka unggal madhab pikeun neangan pisuluheun tea. Kalawan taliti parasahabat teh ngimeutan kaayaan di sabudeureun eta tempat. Sanggeus sawatara lila teu burung oge manggihan sanajan ukur sabeungkeut leutik sewang. Tapi sanggeus dihijikeun mah nya lumayan loba oge.
     Sabada parasahabatna karumpul deui, Kangjeng Nabi Muhammad Saw pok unjukan deui, "Ari dosa nu laleutik teh sarua we jeung tumpukan regang ieu. Mimiti mah teu katingali ku panon lahir, tapi unggal hal pasti aya nu neangan jeung nu ngudag. Naon nu ku aranjeun diteangan tadi, ayeuna geus numpuk jeung katingali ku panon. Tah dosa aranjeun ge teu beda ti kitu. Hiji waktu jaga, aranjeun bakal ningali sakabeh dosa tea. Sanajan gedena ukur sagede buah jara. Nu teu katingali ku panon urang ayeuna. Sajorelat geus numpuk manggunung-gunung."
Tesaf