Conto Ahlak Mulya

ranggeuyan mutiara
DINA mangsa Imam Ali nyepeng kalungguhan khalifah, baju nu sok dipapake ka medan pangperanganana leungit. Tapi, heuleut sababaraha poe ti leungitna eta baju, baju teh keur dipapake ku saurang Nasrani.
   Teu panjang carita, eta urang Nasrani teh ku Khalifah Ali dibawa ngadep ka hakim. Anjeunna harita ngajukeun dakwaan.
   "Eta baju teh boga kuring," pokna ka hakim bari nunjuk kana baju nu keur dipake ku urang Nasrani tea.   
   "Kuring teu ngarasa geus ngajual eta baju sumawonna dihadiahkeun ka batur mah. Kari-kari eta baju aya di ieu jalma."
   Sanggeus Khalifah Ali rengse nyarita, pok hakim nanya ka urang Nasrani tea. "Khalifah geus ngadakwa, kumaha ceuk anjeun?"
   "Ieu baju lain nu sasaha, estu milik kuring," tembal si Nasrani kalawan tandes. "Lain hartina kuring nolak kana kalungguhanana jadi khalifah. Tapi teu mustahil anjeunna salah!"
   Ti dinya Hakim ngareret ka Imam Ali tuluy pok nyarita, "Anjeun geus ngadakwa manehna, tur teu diaku eta dakwaan teh. Hartina anjeun kudu mawa saksi pikeun bukti yen bener dakwaan teh."
   Diomongan kitu ku Hakim teh Khalifah Ali ukur gumujeng, teu lila pok sasauran. "Bener tah naon nu diomongkeun bieu ka kuring teh. Kuduna mah kuring teh mawa saksi, tapi kumaha atuh da kuring mah teu boga saksina ge."
   Nurutkeun hiji rumusan fiqh, geus ditetepkeun yen nu ngadakwa teh kudu boga saksi. Ku sabab kitu hakim ahirna netepkeun yen eta baju teh tetep milik si Nasrani.
   Sanggeus sidang rengse mah, eta si nasrani teh tuluy indit. Sabenerna mah manehna teh nyaho, baju saha eta teh.    Tapi sanggeus sababaraha lengkah ti tempat sidang, hate leutikna leah. Ti dinya manehna asup deui ka tempat tadi sidang. Sanggeus papahareup jeung hakim pok we manehna nyarita yen eta baju teh lain bogana, tapi nu Khalifah Ali.    Harita manehna nyarita kieu, "Cara pamarentahan jeung sikep nu dicontokeun kieu lain cara pamarentahan manusa biasa. Nu kieu mah kawasna cara pamarentahan para Nabi."
   Teu lila ti harita, si Nasrani asup Islam. Basa campuh perang Nahrawan, kalawan kaimanan nu pengkuh, manehna aya dina barisan kaom muslimin nu satia ka Imam Ali.*
T'saf